而家既春节越黎越冇气氛，唯独系睇贺岁片仲有些少气氛。而春节系少数上乜戏都大收旺场的档期。贺岁片呢味野，可能系港产片独有的类型。对，而家内地都有贺岁片，但呢种风俗好大程度（若非全部）都系由香港传过去。至于鬼佬片更加系冇呢家野。由于春节系黄金档期，以前上亲的多数系大片。而有趣地，其实最初的港产「贺岁片」并冇咁明显的新年气氛。最早的当然系「最佳拍档」系列，就只系大堆头。往后过年好多时仲有「双周一成」（周润发周星驰成龙）的大片。不过讲最有过年气氛，当然系去到后来的「八星报喜」，「八喜临门」，「富贵逼人」甚至系「家有喜事」之类。喜剧，大团圆，讲家庭，当然仲有例牌地各位演员出黎同你「恭喜发财」。然后唔知点样呢种风气慢慢淡左，直到年更加大吉利是，新年流流，上套讲白粉的「门徒」，够哂百无禁忌。
所谓物极必反，直到近年「贺岁片」呢味野又走番出黎。多得曾志伟同黄百鸣，其实应该话多得TVB。原谅我低品味，但近年睇曾志伟的「我爱HK20XX」对黄百鸣的「xx喜事」已系指定动作。而差不多每一年我都觉得系曾志伟，即系TVB，比较好睇。原因一固然系佢堆戏「大陆味」冇咁重。因为春节去睇黄百鸣果堆杭洲酒店，我还是拒绝的（虽则最后都系睇哂）。而且，曾志伟堆片，再公式化，始终都仲系有个古仔，有起承转合，黄百鸣果堆就实在太求其炒埋一碟。呢个同幕后班底当然亦有关系。直到旧年，见到黄百鸣同曾志伟合作一齐拍「最强喜事」，实在搞到我乱哂。完全系蜘蛛侠又加埋入复仇者联盟咁，齐齐力撼「金鸡SSS」。而结果两套戏都相当唔掂。退而求其次，不如都系比番「我HK香港」我啦。今年又咩环境？TVB依旧，但变左「冲上云霄」电影版。OK，其实「澳门风云2」都系TVB，但我会理解系「王晶果套」。而两套都当然唔再系「我爱HK20XX」果回事了。另外仲有吴君如再斩多几两的「12金鸭」。曾志伟同黄百鸣？就一齐搞左套票房仆直的「浮华宴」，唔使讲，我梗系全部睇哂啦。排名不分先后，先讲「冲上云霄」。睇戏既野（其实好多野都系）最紧要系自己个期望。贺岁片一般你未入场都知想点。
「冲上云霄」的电视剧，我冇点睇过。顶多睇过下陈慧姗（第一辑呀可？），同埋唔知乜水去欧洲沟女仲要在餐厅影埋相比第条女发现，或者系呀吴镇宇好似要做手术，胡杏儿死过又番生之类。咁对于我呢类背景知识系零的观众黎讲，入场有乜期望先？就都系睇靓人靓景啦。唔通你觉得会有乜剧情？不外乎都系你沟我我沟你沟黎沟去之类。而就此而言，套戏都算合格啦。有人话似睇左几段MV，我觉得系个几公平的评价。喂，系咁上下啦，你妈TVB之余又谂下乜人入场丫。而最好既地方就系，其实呢D咁既情节，拍套戏两粒钟唔够讲哂佢咪好，拖做几十集的电视剧反而仲难搞。真系要讲，比较令人失望既系，D景实在唔系几靓，真系budget有限，定因为好多地方香港航空冇飞？如果你要讲「剧情」或「演技」，其实吴镇宇同郑秀文果条线可能最好，郑秀文演得相当好添。但两位毕竟都一把年纪，特别系吴镇宇，皱哂松哂啦，见佢摆个chok样实在都好辛苦。所以，都系睇另外果两对啦。古天乐同蛇蛇，还可以啦。但蛇蛇都真系一把年纪。系，本人十几廿年前好迷蛇蛇，套「跑马地的月光」我睇左N次。事隔十几廿年，佢真系仲keep得好好，但都真系十几廿年前。男人睇戏既野，梗系自古美人如明将，长江后浪推前浪啦。有得睇，就睇朱璇啦。朱璇真系冇鸠得顶，讲写实就应该三个男主角都争佢，然后三个女主角都想毒死佢。可惜朱璇得果少少戏份。证明呢个世界都唔系讲食力，系讲论资排辈。郭采洁都好架，可以收埋台湾票房添（佢以为），但衰在好多时系个绝症化疗样（咁都闹我剧透？今日元宵都过左啦大佬，况且睇几分钟都估到啦）。人地新年入场唔系想睇呢D嘛。系，当年百无禁忌入场睇「门徒」都系为左睇张静初比人搞咋。唔系你以为睇乜？了解金三角定全球贩毒？嫌回带未回够皮既，放心，无线黎紧仲有套「十月初五的月光」。系呀，就系果套「十月初五的月光」，拍电影呀。又仲系张智霖同蛇蛇呀，我至爱的叶念琛大导导演添，问你死未。
Ok，另一套，「12金鸭」。即系吴君如阵营，大家理解为「金鸡SSS」的延续。坦日讲，「金鸡」算好睇，但「金鸡SSS」已经令我感到极其厌烦。邹凯光果D自以为好好笑的烂gag实在系烦过西。睇一阵都还可以，睇足成套，甚至几套，你开始明白做乜人人都话港产片唔掂。而最重要既系，佢果D自以为好醒既gag，十居其九，都系你上网己经听过十几廿次，识笑既，就真系只系得可歌可泣好惨冇网上（或冇朋友既）果D阿叔。咁唔使讲，讲剧情「12金鸭」当然比「鸭王」之类的垃圾为好。但「鸭王」毕竟有袁嘉敏露点，你入场唔系睇剧情架下话？同样地，你睇「12金鸭」，都系想笑下，你唔系想睇吴君如好似袁嘉敏咁露点下话。而就一套笑片黎讲，「12金鸭」真系冇乜地方好笑。Idea都还算可以，宣传昆你入场亦都做得几好，但执行起上黎真系九流。即系，睇「金鸡SSS」你都仲记得哥顿哥，睇完「12金鸭」你记得乜？系梁洛施？定系（佢以为好好笑）的泰文？而我最记得就系临完场都要整件韩鸠鹿晗出黎chok一大轮，唔知做乜春。吴君如好努力，仲碌左好多人情卡，好多人客串，但谨此而矣。仲要出（多左分几钟咁大把）的「加长版」？冇野下话。
去到「澳门风云2」。套戏其实同第一集系有些少关系，但当然唔睇都冇乜问题。而即系，上集你都仲勉强明做咩叫「澳门风云」。今集，大半套都在泰国，同埋架相当假的「飞机」上面，有何「赌城」？周润发间屋？你话在乌克兰都得架啦。更大件事既系，成套戏头半截，你都唔系好明同「赌」有乜关系。完全系「扫毒」式的泰国着草片。赌局都冇个。睇得最多系发哥玩佢个潮洲机械人。见到Soler条洋肠在赌枱上出现，我几惊会有「咀香园」广告。整体黎讲，唔想新年流流入去睇人做鸭或妒忌人鸳鸯戏水既，「澳门风云2」当然系最多大场面，打餐饱炸餐饱。但剧情一样系咁无聊，甚至比另外两套更加无聊。想重拾以往赌片的味道？王晶都费事再比你回味。成套戏唯一卖点系周润发。但其实就靠周润发加埋张家辉，己经够佢恶搞或抄一大堆其他电影。睇呢套戏，纯系集体回忆。至于剧情比上集更为松散，中段打泰拳之类更加系搵戏黎做拖时间，甚有神级烂片「笑咏春」在咏春街拖足大半粒钟的风范。整体而言，三套戏都系个别分场拍得好，但成套夹埋就唔掂。「冲上云霄」至少有女（即系朱璇），「澳门风云2」有发哥（本人至爱的景甜都比人飞起埋），「12金鸭」就有……邹凯光既笑料咯，你笑得出的话。系呀，仲有黄百鸣同曾志伟套「浮华宴」，冇唔记得，亦唔止系因为篇幅所限。呢套直头值得开一篇新文讲。
赞赏
